…Nagkanhi ka dini sa bukal san tahok. Awat mo na ini kabati, na mayón sini. Sa isip mo, hinanap mo ini kun hain. Niyan, nasusugan mo man gihapon.
Di’ man tanto ini na bukal. Saday na kulung-kulong sin nagtutubód na tubi. Sa tangpi, may namagtubo na ging’ot, payaw, nan sin lingatong. Sa likuran pa, an daragkuon nan haragtaason na kahoy, na naghahatag dini sin tambong. An alidad na radag san uga nira na dahon, may maluway na hagrapas na pahanga mabati. Ma’o man an kiwa san tabayukyók na malin hiwod sa ulut sin mga ging’ot. Mahód may huni sin insekto, o sin tamsi.
Di’ man nagkikiwa an tubi; wara sin rapgas sa mga bato.
Sa butnga sin diyo nan talagsa na ribók, an kawara-ribók.
Bagaw san nabati mo, dini nganyan sa sugad sini, kumanhi ka, nan pamati’an mo…
Una, nabati mo an bukal nan san nakapalibot kaniya… Mamangno, nabati mo an sadiri mo, an mga nalalangkagan mo, an mga inmamaw’ot mo, an mga gusto mo… Dinara ka sini sa harayo na na nakaagi. Nan luway-luway ka dinara pakanhi, sa niyan… Niyan na uya ka, bunalik an mga ribók na gusto mo kunta dulagan, punason, talikdan… Ugaring, labi niyan dini sa kawara-ribok, malin mas makusog an tag’ok sa sulod mo: Ayaw pagpili’a an kawara-ribók. Sabiha an nasa bo’ot mo. Kun kinakaipuhan pa, itag’ok mo!
Pagkabati sini, tunungkahal ka, nagpasalamat sa bukal, nan sa nag-aarataman sini, nan naglakaw ka pabalik sa ribók na imo kunta indulagan. Bilog an humot mo: idudugang mo an ribók na hali sa imo…
Pamúghaton 