Burunggás

morobkas‘Hah! Hah! Hah! Halhal kita sin kabubukod sini na paraisda… Hoy! How’y! Paghulát ngani…!’

‘Aw…, nano tabi an gusto mo… angol? Lubayán? Parangán?’

‘Diri. Nasikóp ko kangina, mayon ka sin inatado na gurubkás…’

‘A, murubkás… Ubos na…’

‘Gurubkás… Mga murubkás man sini… Iya, kun wara na, di’ bale na… Atog kay bagaw ko kun makasuda sin sinuwaan hamok…’

‘Nabati mo an sabi? Gurubkás nganyan. Tuna ako mabuhay nan makatadi sini na isda, an aram ko na gahoy sini, murubkás… Di’ man liwat masabi na iba man na isda an insasabi…’

‘Iya, mayád so’n, kun sa Madlawon ka, an tag’ok mo murubkás. Kun may tuda pa pag-abot mo sa Sabang, an itag’ok mo naman, gurubkás…’

‘Ma’o. Sadáy-saday na isda, di’ pa nagkaka-uruyon san ngaran…’

‘Aw, badi pag-abot sin panahon, kun intero na Isis bunuruot na, an mga rebelde namurunay na, an mga hold’aper nan karnaper nan kidnaper nagkabiritay na, an intero na makalit sa gobyerno pinanggakot na sa pusgo sin kutitob sa sulod sin tolo kasemana, badi maghiran na man an mga Madlawonon nan mga Sabangnon manungod sa kun arin an tama na ngaran sini na saday-saday na isda…’

‘Hmp, kaya ako, sa sardinas na’k… Wara pa ribok…’
__________
Retrato tabi ni Alma Jane Gamil. Salamat po.

Advertisements

Anonas

anonas.j‘Mabungahon an merba sa kudal mi…’

‘May hinog?’

‘Mayon. Kilaon kay dulawon an kolor san hinog. Imudon sa berde na dahon…’

‘A, ma’o yo’n an bagaw ni Dappy, anonas…’

‘Sin’ na Dappy man?’

‘Aw, di’ an soltero na taga-San Jose…’

‘Nano an tingarani niya, Kurdapyo?’

‘Tsk, ku’an, Hermogenes ada…’

‘Akay man naging Dappy?’

‘Aw, kay kun nangintris nganyan, paghaputa kun mapakarin, bagaw nganyan ‘Dini, ma-dapal…”

‘A. …Iya, pan’o man naging merba an anonas, o an anonas naging merba?’

‘Ay, ambot…’
__________
Retrato tabi ni Alma Jane Gamil. Salamat po.

An hade san mga prutas

durian‘Niyan baga na Hunyo, tuig san durian. Sa Davao, sa Malaysia, Singapore nan Thailand, daghanon niyan an tinda… Malin dini sa Bulusan, may nagkamaramat na man na durian…’

‘Sugad baya yo’n sin ogob, ha? nan langka? Mayon man sin tunok?’

‘Kapamilya ada. Magkairiba hamok an rami nan damo san liskag…’

‘Di’ ako so’n makaon. Maski sabihon mo pa na hade yo’n san mga prutas…’

‘Kay akay man?’

‘Bagaw pan’o san padi ko, mabang’ugon kuno yo’n…’

‘Sarin kuno kabang’og?’

‘Ba’ah, na sugad nganyan sin ku’an… p-phu-day, he he he…’

‘Nagsabi so’n?’

‘Oo.’

‘Hm, badi wa’ pa ngani siya pakatadi…’

‘Sin durian?’

‘…Sin puday…’
____________
Retrato tabi ni Sg. Salamat po.

Interbyu ni Posong sa bays prisident

kasilyas.ed(Wrssss. Splaasss. Ksssk. Kssst. Plak!).

(Tok! Tok ! Tok!) ‘Ah… Mister bays prisident! Ser! Mister bays prisident! Na’bati mo tabi ako? Mister bays pres…’

(Phooot! Plok! Plok! Plok!) ‘Ahhhh… O-oo. Whuuu….! Nababati… uhhh… ko…. uhhh… ikaw…’

‘Ah. Gud! Eh, ser, ako tabi an mainterbyu sa imo, taga Radyo Bentado nan Philippine Starbucks…’

(Proooot! Plok! Plok!) ‘Uhhh, s-sige Nono… Uhhh… Oke…’

‘Nano tabi, dagós na ng’ud an pagdalagan mo pagkaPrisidinte? Di’ na nag’ud yun ma’pugulan?’

‘A, di’ na. Maski nano pa na atake nira sa ako, di’ yun makapadulot.’

‘Akay tabi di’ ka indudul’tan sin mga atake?’

‘Aw, kay intero sira, kun may bertdey, may regalo na keyk hali sa ako. Kada pagbaton nira sin keyk, may bidyo ako. Kun umungod sira sin atake, ipangluwas ko an bidyo. Di’ ma’raw’ayan sira?’

‘Kay nano baya tabi, ungód na dako an pakang mo sun na mga patrabaho mo sa Makati?’

”Laki inih. Maniwala ka man na sugad ha’k so’n an pakang ko? Nano, pakang-pakangay…?’

‘Aw. ma’o, ha? Iya, nano man an masasabi mo sadto na iskandalo nganyan sa Bangyan?’

‘An sabi ko baga, kaipuhan man ni Dyunyor sin diyo na respeto. Kun habo nira irespeto si Dyunyor, maski an payong na hamok niya an respetuhon, simbolo baga san kaniya pagkameyor…’

‘Aw, ma’o, ha? Iya, yadto tabi na kaurigan mo sa Batangas, sa imo man nag’ud yadto?’

‘An mga baktin, sa ako. An tangkal nan san mansion, inpapahudam man ha’k sa ako…’

‘Akay man tabi erkondisyon an tangkal?’

‘Bagaw pan’o san US labtes, hababa an kolesteról san karne sin baktin na hali sa erkondisyon na tangkal…’

‘Aw, ma’o? Iya, sarin man daw ka’taas an IQ ni Nanse?’

‘Aram mo, Nono, kun sugad so’n an hahaputon mo, badi sabragan ko ikaw udo…’

‘Ah, s-sori po, ser… Iya, akay man tabi naruyagon ka mag-intra sa Boy Iskawat? Diri ober eyds ka na?’

‘Do’on sa Boy Iskawat, di’ bale ober eyds, basta diri ober hayt.’

‘Sa pag-imod mo tabi, sin’o an makusog mo na kalaban? Si Pu o si Doderti?’

‘Lintiguyan… Si Pu, porendyer. Si Doderti, leptis yun… di’ yun manggagana…’

‘Iya si Mahar?’

‘Aw, kun suportahan siya ni Kris. Iya kay awat na sa ako si Kris, sanglit an…’

‘Sanglit an nano tabi?’

‘A, wara.’

‘Nano man tabi an masasabi mo san mga inpaparasabi ni Monsood manungod sa imo?’

‘Hmp. Naawa ha’k yo’n…’

‘Iya, sin’o na tabi an magiging bise mo?’

‘Aw, daghan an gusto… si Bu-ang, si Chua-pang, si Sy-quat, si Tyang-ko…’

‘Akay malin puro Insek? Habo ka kun Amay? Baga nagpiprisintar…?’

‘Hmp. Naimod na maitumon man…Uhhh. Whhh!’ (Swass! Swasss! Wiswiswis. Splaaassss. Plog! Ko-rog-korog! Iiiiiit. Blag!) ‘Hay, salamat. Whuuuh! Ma’d na paso dini sa kasilyas sini na munisipyo niyo dini sa Montalban… Nagtatangkarat kita, may nagpapabukod pa na uyang nan ulahipan…’

‘S-sori, ser. Badi wara pa yun kahingayad…’

‘Whuuh! Kun makaluwas ako, ipahingayad ta ini. Ipa-erkondisyon ta, nan butangan ta elebetor…’

‘S-salamat, ser. Di’ makapakang naman, ha?’

‘Sshh. ‘Sinkaribok… Sin’o ka baya ngay’an? Taga-dini ka sa Montalban?’

‘Posong tabi an ngaran ko… Taga-Bulusan, Sorsogon…’

‘Ay, ganahon ako do’n san 2010. Badi sa otro taon, doble an gaganahon ko do’n…’

‘Aw, syempre tabi… Pag-imudon ka pan’o sugad ka man hamok sin taga-sa amo, sa Ilawod…’
_______________
Retrato tabi ni Ed Uy. Salamat po.

Tangíd

tangid‘Papay! Papay! Artista na si Laling! Kinuwa na artista san nagsusyuting! Parakulintas ha’k sin tangíd…!’

‘Syuting diin?’

‘Sa uma ada tabi… ambot kun diin na uma…’

‘An inpahimo ha’k kaniya, magbaliog sin tangíd?’

‘Ompo… Mala kay naruyagon… Bagaw kuno, kun may tangíd pa kunta na daghan, badi daghan pa an kuwaon pag-artista…’

‘Tsk. Kanugon, kay inparapurulod ko an mga puno dini… Inparasiri’ak hamok… Inparagaratong…’

‘Kanugon san tangíd?’

‘Diri. Kun wara ko pagparapuruluda, makaartista man kunta si Mamay mo… Badi bida pa kunta…’
_________
Retrato tabi ni Alma Jane Gamil. Salamat po.

Pagpamará

bandala‘Aw, ho, si Mariota, kay nanghalayhay na naman san bandala niya… Malin gabanihon na yo’n sin hulit-hulit na kahalayhaya…’

‘Ma’o. Badi guk’alon na yo’n. Wara na ngani ada sin pisada… Kun pinisár na yo’n sadto pa, nakadelihensya kunta…’

‘Tsk. Kairo man sini na ‘laki… An makareparo sini na inhihimo niya, masugad, nagpoprotesta…’

‘Protesta…?’

‘…Kay malin wa’ na man naglalalam sini na kamutangan san mga abaka dini sa ato. Dini na’k ada sa Salvacion mayon sin nakahag’ot pa niyan. Badi dini na’k may nag-ooperar na garingan…’

‘…Badi dini na’k may maaram magluknit, ha? Nan magbutong, he he he.’

‘Badi…’

‘Kay akay baya sunugad sini ini na ‘laki?’

‘Aw, kay binayaan baga ni Marieta? PunaManila nan wara na pagburu-butwa?’

‘Nano man an koneksyon sini na bandala?’

‘Ambot. May naruruyagan ha’k ada pagparahimo’on. Halimbawa, pirmi nganyan sini in-uulon an nabilin na daster ni Marieta…’

‘Aw, kay basi ada madumduman siya, ha ha ha. O, basi di’ niya malimtan an baho, he he he. Nano pa kuno an inpaparahimo?’

‘Aw, di’ oro-adlaw nganyan, pira kabeses inhahasa an sundang…’

‘Hssss. Ma’o yo’n an diperensya…’
____________
Retrato tabi ni Sg. Salamat po.

Panglimpya

beach‘Olympiaaaa! Nano na? Akay ma’o na naman yo’n na selpon an pugol mo? Diri intutugal ko ikaw na manglimpya? Nano ka, bungol?’

‘Hmp! Human na tabi… kangina pa…’

‘Nanilhig ka na?’

‘Ompo. Yadto na sa luwas…’

‘Aw, mayad-ayad. Kay, bagaw, may mga artista? Makaimod na kita. Hala, ‘mus na!’
_________
Retrato tabi ni Alma Jane Gamil. Salamat po.