An salâ, an diri tama, na pagdukot kun Hermenehildo

Gumók an buhok ni Oya Adelaida. Magiláng an panit niya sa luhà nan sa dangga. Naniringkit an kaniya mga mata: inít, hadók, nakukulugan, nagsusumat, nagpapaapin.

‘Hu hu hu… Naabót pa man hamok siya, hali sa uma…, di’ pa ngani nakapamisay san dara-dara…, hu hu hu… mala yun, ho, na gaway sa anahaw…, nabut’sán san makigkusail siya… nagkaluob lugód an sulód, hu hu hu…’

‘Di’ ngani nagharatag sin kagalangan dini… nagbarasang hamok… tunarangbara na wara patabi-tabi, hu hu hu…’

‘Kami pa an naghapót… kun sira sin’o sira, kun nano an tuyo nira dini… Di’ man ugaring namagsimbag… di’ ngani nakiasdangan…’

‘An sabi hamok san sayo, ‘Ikaw si Hermenehildo? Ikaw si Hermenehildo?’

‘Unu’o man si Dodong, hu hu hu, kay ma’o man yun an ngaran niya… Ma’o man yun an ngaran san amâ niya…, hu hu hu…, nan san gilóy niya…’

‘Bigla na hamok siya sinagumok san duwa… pagkatumba niya, inbuligan siya, hu hu hu… Adaw, dyusko, sugad siya sin hayop na in-aradóng-adungan, hu hu hu…’

‘Maski diri ada nasasabutan an nangyayari, hu hu hu…, unayo pa siya sin tawad, hu hu hu… tinaas an kamot, nan bagaw, ‘Patawad po, sir! Patawad po, sir!’…’

‘Nag-aayo na tawad, nakaluhód na, hu hu hu… dinara pa…’

‘Maski ako, sa hadok ko sadto na mga lalaki, nan sa luoy ko kun Dodong, nagparapakimaluoy man ako… hu hu hu… hasta san indadagnas na siya pakadto sa traysikel nira, hasta san intatalukang na si Dodong na nagkukurarat, nan nakigkusail ngani…’

Nan dunamag si Oya Adelaida sin makalolo’oy na damag.

Sa salóg, naiimód san mga nag-urusyoso an nabut’san na sarungsong sin anahaw, an mga sulód na ibererdura, an bugtö na sinelas, an tari na naki-usyoso man. Silensyo an mga tawo na yadto. Wara sira masabi.

Sugâd sira sadto san unabót si Inoy Indoy…

‘Nah-nano an nangyari…?’

Sa pag’itan sin bakhô, inistorya ni Oya Adelaida an nangyari pa hamok.

Nginarat pa sira san maaburido ugaring si Inoy Indoy, kanira. ‘Nano? Kay akay sugad so’n? Intugón ko pa’k, na agdahon sin mayad si Dodong… Matagal sini na bata, na dirarikon na…’

‘Kay nano man an maraót so’n? Akay kaipuhan nira tokhangón si Dodong?’

‘Toh-tokhang? Nano na tokhang? Para bubur’gan?’

‘Aw, kay sira sin’o yadto na nagkaranhi?’

‘Aw, sin’o pa? Di’ an mga makuapò san taga-Sapngan na paraburog? Hala, do’on ngon’a kamo, kay akò kadtuón… Lingku’as na…’
________________
*Kun diri ka nakatinawá sini na istorya, di’ bale, tabi. Kay an tokhang, maski diin imudón, bagay na diri man nag’ud makatitinawa.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s