Notisya halì sa luyó san lawód

SINGAPORE – Pakahuman sin toló kaadlaw na pagbati, tunuga sa akusasyon an mag-asawa na Singaporean na punagutom sa kanira kadanon na Pilipino, na naging dahilan san kaniya pag-iban timbang sin 20kg sa sulog sin 15 ka-bulan.

Si Oya Thelma Oyasan Gawidan, 40, nagtimbang na hamok sin 29kg san maospital siya sa Tan Tock Seng Hospital san Enero 2013.

An kaniya amo, an negosyante na si Lim Choon Hong, 47, tunuga sa karga na pagbayolar sa Employment of Foreign Manpower (Work Passes) Regulations 2012, na nag-oobligar sin mga empleyador na magsweldo nan magpakaon sin tama nan magpabolong sa kanira mga empleyado sa balay.

An asawa ni Lim, si Chong Sui Foon, 47 man, tunuga man sin pagdanon sa paghimo san krimen, na may sentensya na hasta 12 kabulan na pagkakulong nan $10,000 na multa.

Bagaw san abogado nira sa korte, nagpapaimod nganyan an mag-asawa sa sayo na psychiatrist, kaya kaipuhan pa nganyan sin diyo na panahon para makareport an parabolong. Tunugot an huwes sin hasta Abril 20. Nakaluwas sira sa pyansa na $3,000 kada sayo.

Bagaw ni Lim sa pagbati, may hapdos nganyan an asawa niya na anorexia nervosa, o nganaon na karuyagon na maghugos, sa paagi sin pagsayuma sin pagkaon. Dahil sini, an ugali nira, ‘nagtuturu-taririk sa pagkaon nan kalinigan’.

Tinatagan hamok ni Lim nan ni Chong si Gawidan sin duwa kabeses na pagkaon sa maghapon.

An una na pagkaon, na hinahatag mga ala-una hanggan alas-dos an ma-aga, duwa o tolo na hilap sin tinapay nan sin sayo o duwa na pakete sin instant noodles. Kun iba na, binabangutan ni Chong sin tagdiriyo na gipad sin sulihon nan karne an instant noodles.

An ikaduwa na pagkaon, na hinahatag na tiuudto o atab na hapon, may lima o unom na hilap sin tinapay hamok.

Si Lim an naghahatag san pagkaon ni Gawidan. Sira na mag-asawa nan san kanira kabataan, iba man an pagkaon, na mas daghan, nan mas masustansya, kaysa san inhahatag nira sa kanira kadanon.

Kun mainóm tubi si Gawidan, kaipuhan niya mag-ayo kun Chong, na nasalod sa gripo san ipainom kaniya. San Pebrero 2013, unalto na pagregla si Gawidan Nagrugon an kaniya buhok pira kabulan batog sadto.

Binawalan man ni Chong an kadanon na gamiton an kasilyasan sa balay nira. Kun magamit si Gawidan, didto sa kumon na kasilyasan san condominium. Tinutugutan siya magkarigos sin duwa hamok kabeses kada semana, bantay si Chong sa luwas san banyo kun nagkakarigos siya.

Bagaw pa ni Gawidan, dirì inhatag kaniya an kaniya sweldo, kinumpiskar an kaniya telepono, nan diri siya inpapaluwas sin balay.

San Abril 19, 2014 na aga, dunulag si Gawidan san mapagsolo sa harani san elevator san condominium. Kunadto siya sa harani na Far East Shopping Centre, hunudam sin telepono basi magahuyan an kaamigo, na ma’o an nagdara kaniya sa sayo na sangputan san Humanitarian Organisation for Migration Economics (Home). An Home an nagsumat san mga reklamo niya sa Ministry of Manpower.

Si Gawidan, na may tolo na kabataan, nagpapasweldo pa niyan dini, sa iba na na amo.
_____________________________
Pinalís halì sa Straits Times, Marso 23, 2016, 3:53 PM SGT. An retrato tabi kuwa sa Pintô Art Gallery. Salamat po.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s