Dyip: An burak sa poso

Si Tolindoy an nagtukdö san ngaran sini: bandera espanyola. Ambot kun diin niya kaadmi. Siya man an nagngaran san saníg san palwa sin lubí: barukabok. Sa pungko, an mga tamsi nganyan, tì’tì, nan saguksók. Makusugon an bo’ot niya magsakát sin lubí. Diri liwát basta lubí; layog na lubí, kaurupod an lubí sa bulód sa itaas san Poctol, na intatamaan nag’ud san hali sa dagat na hangin, na inpapaanudan san mga inpapalayog na buradól. Mahod na’ganya pa siya sa namagburadól, na indidiyo-diyo’an pa nganyan niya magaptán an mga tinatâ na buradól.

Sa arin yadto, may naghuring, na wara na nganyan sin Tolindoy, nag-uná na kun diin.

Niyan, nadumduman siya, san maimód ini na mga burak dini sa baniká. Duláw an kolór sini na burak. Mayón pa sin sugád sini, na an kolór, bagá. Daghan sini sadto sa iskwelahán sa Poctol, nanaláytay sa in-aawasan san tubi hali sa poso.

An tubi sa poso, makusugon an wagâ’wà. Diri na kaipuhan bombahón, kay nag-uunáy na pag-awas. Ugaring, an tubi, malangsa. Diri nag’ud sugád san tubi hali sa Dolipay nan sa daghanon na salog nan sapä dini sa Bulusán.

Maski sugád, diri man kawad’an an tubi sa poso, kay dini nanawsáw an kabataan na naglalapók hali sa pagtanóm sa garden san iskwelahán, o pagralantuag, nan sin maski sin’o na malabay, na nadadagka san tubi na makusóg, na libre…

Marasa pa, na yadto na tubi sa poso, malangsa. Badi kun hinararóm pa sadto an ukad, maski diyo pa, badi may lunuwás kuntà na krudo o gasolina.

Kundi, kun gasolina, diri magkakaburuhay an mga bandera espanyola sa lalabayan na kali, nan san mga paray sa pasakáy na inaabot san tubi. Nan magiging malang’og an palibot, di’ bale mga makwartahon an tawo, kun an magkakaburuhay hamok sa palibot, mga taklä, nan sin subó na malang’og.
______________________________
An retrato tabi, kuwa sa Guinlajón, Sorsogon.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s