Dyip: An banwitan

An una, nan urhi, na naimód na water lily sa Bulusán, sa fish pond san iskwelahán. Puti an burak, na halagpadon, na malin sugád kadako sin planggana na sadáy. Di’ man intatarapid yadto. Maski sin’o, maski mga maestra, wara sin nag-aayo, o nagkukutós, sin mamat bagá.

An sayo ada na dahilan, an tanuman. Naiisip ada sin maski sin’o na madadagka kunta, an pawot sin pag-ukad, nan pagpatubi, pagpapuno sin tubi, basi matamnan sini na water lily. Imbes na ukadon basi mahimo na tanuman, mas bali tap’ungán na hamok sin sinilhig, o ginusáp. Sugád ada sini, kun akay mas popular an basketbol, kumpara sa baratirán nan sa putbol. Kulang sin baniká. An gol sin basketbol, maisab’it maski diin, maski sa iraróm sin hagdan, sa puno sin langka, sa pinto sin aparador, o sa tungkarog sin kasilyasan…

Eniwey, an water lily sa iskwelahán, tanóm nan ataman san paraatamán sadto san iskwelahán; si Inoy Sunday. Sa iraróm sini na water lily, mga puyó nan haruán. Mahiligon magbadíl si Inoy Sunday, san badíl niya na de-bumba. Mahód pinapraktisán niya paghimuntahá an mga isda sa pispan niya.

An kabataan na lalaki sadto, mahilig manakóp sin isda sa lapok: haruán, puyó, nan iít. Kun naghahanda na san layhon na tanuman, naki’alagáw-agáw an kabataan na lalaki, namagdakóp san daghanon na isda sa lapok, na malin nawawarà kun mamará an pasakáy, nan naburutwa gihapon kun matubi nan may lapok na.

Di’ pa nagugustuhán, san maadman an pispan ni Inoy Sunday, naghirimo banwit, nan pinahuladan an mga isda sa iraróm san water lily. An pispan ni Inoy Sunday, naging banwitan.

Maisog an pandok ni Inoy Sunday. An ungód mabo’ot siya. Kun naiimód an bigawnan sa ibabáw sin dahon san water lily, kinukuwa niya, nan pinupukpok sin bato an salait, basi di’ na magamit. An tagbanwit, di’ man niya inaano.

Namatay sa aksidente si Inoy Sunday. Naputukán siya san kaniya badíl na kaniya inlilimpyahan. An kaniya pispan, niyan, malin wara na. Tinahuban na, nan binugsukán sin dagdag na iskwelahán.
_________________________
An retrato tabi, kuwa sa Guinlajón, Sorsogon.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s