Dyip: An paglabay

You are the children’s eyes
and I’m the days gone by
– Seals and Crofts, Ruby Jean and Billie Lee, 1973

Pirmi ‘gud nasa unahán an imod ko; sa agihan, sa aagihan, sa nag-agi na nasa unahán. Kay syempre, di’ man ako nagsisinibugán. Pirmi ako paunhán, pakadto sa kun diin-diin. Sayo kaadlaw, dini sini; sa may kaging’otan, sa barisbisan sin mga patanuman, sa hirig’tan sin kakarab’wan. Mahod may nalalabayan na sarantarín, mahód may nagbabarayle, may nagtatarangwáy, o nagtitirigbasan…

Kun iba na, may pag-urán. An urán, mahod tinik-tinik, mahód busabos. Mahód may baróng-baróng. Kun mayád an panahon, ay, mayád man an mga pamati. May kaogmahan, kaparang’an, kasiributan, kagalatan.

An tagbong bagá, nagiging lubi, na nagiging layog. An pangaláng-alang, nagiging kusóg, na kun iba na nagiging abuso. Imudá an tubód dini sadto, na sinagop. San mautadlán pagbulwangá, may inanod na bulawan. Ma’o yadto an in-unungan sin hiriran, sin mga gera, sin mga bag’o na sinaragdáy na republika.

Kun iba na, atabon pa an akò paglabay. Kun iba na, hataas na ‘gud an adlaw. Maski nano pa, pirmi ko ikaw nadadakóp do’n sa piliw, nagsisikóp, nagyayanghád, malin naghahapot, ‘Arin daw an maisog, sa maw’ot nan sa lunos? An harayo an abot, sa tan’aw nan sa hunâ-hunâ?’

Panabot san iba, ikaw an galát. An ungod, dahilan ko man hamok ini na paglabay, na madakóp ka pa niyan. Kay buwás-buwás, kun di’ ka na makatios, hahanapon mo na an simbag sa nagdadaghan mo pa na kahapotan. Nan di’ ko na ikaw maiimód dini, sa piliw sini na sadáy na tinampo, kun makabalyo ka na didto, sa tangpi sin mas dako nan halapad na agihán. Arám ko ini. Kay ako an panahon na naglalabay, nan ikaw an alimutáw sin bag’o na tawo.
___________________________
Retrato tabi ni Alma Jane Gamil. Salamat po.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s