Dyip: Pag-abót ni Ente

Nagbus nganyan siya kay, sa kaawatan tuna san urhi niya na pag-uli, gustuhon niya gihapon na masarihán an pagsakay sa bus, paglabay sa mga bungto san Quezon, Camarines, nan Albay, nan pagsakay sa dyip; hali sa Sorsogon hasta dini sa Bulusan.

‘Bagaw ko ngani, kun bus pa gihapon hali sa Sorsogon’, bagaw niya. ‘Nalangkag man ako san mga bus na tayóng, an may ulo baga? Na kun nalabay sa lubak, sugad sin magbuburulag an mga tapalodo, nan san mga kadailan sa sulód san bus.’

‘Ay, san matan’aw ko an pila san dyip pakanhi, sa Gubat, grabe an ruyag ko. Nadumduman ko an halo-haloan, nan san sinehan na Oga. Ma’o pa man an lugar san dati na paradahan…’

‘Di’ pa puno pag-abot ko… Kaya, bagaw ko, mayad pa, mangalag-kalag ngon’a. Mala, kay nakabakal ako sin sinelas na lubid, sayo na supot na sortidos sa makaw, nan sin parol na kaligay, he he he… Di’ man nag’ud kaipuhan, gusto ko ha’k gihapon masarihan, he he he…’

‘Bagaw ko kun awat pa… Pagsakat san drayber, bigla ‘to’o an pagkapuno san dyip… Mala, may huyabit na uga’ng, he he he… Hasta sa uluhan san dyip, hasta sa bubong, he he he… Ay, atog, bagaw ko, ma’o pa man…’

‘May nakatimala sa ako. Naghapot kun ako baya nganyan si ku’an… Aw, marasa ka na si Miss Futalan ngay’an? Pasahi’an ko kunta. Wara ‘gud patugot na diri siya an mamasahe sa ako… Mala an istoryahan mi, hasta san lumusad siya sa yungod san balay nira sa Buhang… Ritayr na ngay’an siya… Wa’ na nag’ud ngay’an kaasawa, he he he… Ambot man kaniya, kay mayad-ayad man baga? Nan mayadon yun na maestra… Nahibi na’k yun kun na’ringsalan sa amo, he he he…’

‘Pag-abot sa Layog, lunuway an dalagan san dyip. Kunaskas gihapon san may hunuring na san numero na binola. Ay, na diyablo, he he he… An hweteng ngay’an yadto… Pag-agi sa Porog, may sinakay na lima na sako sin lubi. Di’ na ngay’an inlulukad an lubi, ha? Pag-agi sa Dancalan, may hunuyabit man na paratinda isda. May tinda na angol. Mga katuigan nag’ud an kadaragko. Nakakuwa man ako duwa na atado…’

‘Paghiraun-daon san dyip dini sa Looban, ambot man kun akay, sugad san dati, kun tilulusad na ako, grabe an kulba ko… Sugad sin sa ako intiro nag-iirimod an mga tawo… Sugad sin, sa pamati ko, maski diri inhihirilwas, inhaharapot ako san kanira mga sayod, kun mati’ano man an naging lakaw ko, kun nautob ko man an panuga ko, kun ako pa gihapon yadto na tunaliwan san adlaw na yadto, na kanira hinatod, sini manta na kanira mga sayod…’
______________________________
Retrato tabi ni Alma Jane Gamil. Salamat po.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s