‘San 1936 Olimpiks sa Berlin, may medalya an ‘Pinas: sayo na bronse, na pinadanggahan sin sayo na uragon’

20170112_2114350May sangtaon pa sin preparasyon para sa 2012 London Olympics, basi makakuwa kita sin bulawan. May siyam na medalya na sa Olimpik na inani sin walo na Pinoy, batog san 1928: duwa na pirak nan pito na bronse. Wara bulawan.

‘Mga sisenta na nasyon an may bulawan na sa Olimpik, tag-pinit nan tagpaso. Sa Beijing san 2008, may 204 na nasyon an nakiuyag, 55 an nakakuwa sin bulawan. An una na tolo: Tsina (51), USA (36), Rusya (23). Sa mga nasyon na unintra, 87 an, sa tidiyui, nakakuwa sin sayo na medalya. An Pinas, kaupod san 117 na unuli na wara dara na medalya.

‘Ma’o ini an mga medalya san Pinas san mga nag-aragi na uruyag:
Amsterdam, 1928, Teofilo Yldefonso, bronse, langoy, 200m breaststroke
Los Angeles, 1932, Simeon Toribio, bronse, hataas na lukso, Teofilo Yldefonso, bronse, langoy, 200m breaststroke, Jose Villanueva, bronse, boksing, bantamweight
Berlin, 1936, Miguel White, bronse, 400m hurdles
Tokyo, 1964, Anthony Villanueva, pirak, boksing, featherweight
Seoul, 1988, Leopoldo Serrantes, bronse, boksing, lightweight
Barcelona, 1992, Roel Velasco, bronse, boksing, lightweight
Atlanta, 1996, Mansueto Velasco, bronse, boksing, lightweight
An may medalya, maski wara hamok bulawan, 41 na nasyon. Pinas an tidaghani, 9.

‘Si Teofilo Yldefonso, binansagan na Pating na Iloko, may duwa na medalya. Ugaring, tangkodi, kun sin’o sa walo, Nono, an tunay na uragon? Tangkod: si Miguel White, kay Bikolnon.

‘Tama, kay an ama ni White (1909 – 1942), Kano, nan an ina, Sorsoganon. Nagdako si Miguel sa Albay. Wara nakaaram kun kan’o nag’ud siya kamatay, kay soldados siya, sayo pa na namatay sa Ikaduwa na Gera San Kinab’an, 33 pa hamok an edad.’
____________________________
An titulo nan san istorya, bilog na pinalis hali sa panurat ni Inoy Godehardo B. Calleja, sa libro na Burak Na Magigi Pa, binisay manta niya, Balay Ibalon, 2012, Ottawa.

Ini na libro (retrato), mababakal sa baratohon na presyo, kaurupod sin daghanon pa na libro, na sinurat sin Bikolnon, sa surumaton na Bikolnon, o manungod sa Kabikolan, sa maabot na Ika-12 na Aklat Ani sa Pebrero 17 – 19, 2017, Byernes nan Sabado, sa Museo de Legazpi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s