An butngâ

13301528_1093691044037389_2305868099743840269_oMaski harani hamok an naabot san kaniya pagsudup, ini na lalaki, naanad na sin harayo na pag-imod, hararom na pag-isip nan, kun kinakaipuhan nganyan, mahiwas na pakasabot. Tatan’awon niya an lawod nan kakarkolohon an unhan pa san gutob san kaniya pag-imod. Oobserbaran niya an taob nan san hubas, an tagbalod nan tagkalma. Kunanhi na siya na maaga, udto, panirum-sirom, nan katutnga. Hinulat na niya an pagbag’o san bulan, hanap an simbag sa kun may relasyon an ugali san dagat sa suna o presensya san bulan.

Kun nano-nano an nauutadlan san kaniya paghuru-himunta nan ‘nano baga, ha?’ Mahod nagagap’tan niya an umal nan kinakarkolo: Nano daw kun an polo sin sundang, dini sini sa butngâ, imbes na sa sayo na durho o puno? Halimbawa, pabalintukon an silya, nan sa irarom san ingkudan, didto umingkod, nan an siki sa likuran, maging hurandigan? Kun an drayber ada sin dyip, didto sa bubong, imbes na pasahero an mamaghuyabit? Diri mas makasayod siya san agihan? Aw, kay sinari na ngani niya, sayo na paniudto, na ubuson ngon’a an tubi sa baso, isunod an suda, nan ipa-urhi an luto. Ambot, kun akay wara na man kahunod.

Minsan, bagaw sini na kararani, aw, akay daw wara pagluluwas? Di, sinikop, inughoy kun mati’ano. An simbag, harayo sa inlalaom: ‘Atog, wara na ako bugas, nan sin lana, nan sin habon…’

‘Iya’, bagaw san nag-ughoy, ‘akay wa’ ka kakadto sa tindahan? Kun wara na, nabakal. Kun wara ibarakal, inuutang, kay pan’o man?’

‘Hmm, insasari ko man ha’k…’

‘An arin?’

‘Kun marani man si Inoy Tura na tag-tindahan. Marasa na ako ha’k pirmi na parabakal an magrarani sa nagpapabakal? Nano daw kun siya naman na nagpapabakal an magrani sa sugad sa ato na parabakal?

‘Ay, ba’adaw…’

‘Kay kun diri sa ato na parabakal, sin’o man an pabakalan, aber?’

‘Kay kun wara ka mabak’lan, diin mo man kukuwa’on an imo kaipuhan, aber?’

‘Kay arin baya an una, an bunay, o an madlos?’

‘Ay, ambot sa imo…’

Kapay nganyan siya, o lidaw, o may diyo. Mayad, kay di’ man ‘gud nauraw, o nangudyot. Padagos siya sa iba man na pag-iisip. Mala ini na sayo na ehemplo san kaniya himo, an sakayan na sa luyo hamok an katig. An kahinimbang nganyan sini, an gilawasi. Kaya kun nasakay siya, nangingkudan siya sa butngâ san urhi na katig, lungtog an siki sa butngâ san una na katig.
________________________
Retrato tabi ni Alma Jane Gamil. Salamat po.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s