Salbatana !

salbatanaKun na’init an Bulusanon, maaram man magmuda. An salbahi, hinimo na salbakut, o salbakuta. Kun pinatayunas pagbati’on, hinihimo na salbatana… Halimbawa: Salbatana kay nabuwaan man ako sini na insyurans…

An salbatana man, nan san panalbatana, parte san buhay san Bulusanon na bata na lalaki. Kun niyan maluya an wara sin cellphone, sadto, maluya an bata na wara sul’ot sa agtang na salbatana.

Kay may salbatana, kaipuhan manalbatana. Sadto pa, maila na an tamsi dini sa Bulusan, unong ada san kasalbatanaha. An palagô kun nadapò sa alom, di’ pinatawad. An maya, kun nahapon sa paray, di’anison na himuntahon. An tikling nan san tikugas, kun na’sikup sa kagawayan, ma’o man.

Kun kinukulang na sin tamsi, daghan pa gihapon an praktisan, sugad san mga bubong na sim, na di’anis man pagpalagatakon. Yo’on man an nalagalag na manok, salampati, o pato. Kun iba na, kun nakasagka sa uma, di’anis man manghinggit san pili na nalihisan san kawit. Masakit hamok igo’on kun mahangin.

An ruyagon ko na salbatanahón, an paklang sin saging. Mayad pa ini kay diri makalulu’oy kun nagkakabarari. Tutal, kun may paklang man na tadong paghinanapos san Hunyo, badi ubos man hamok san bagyo na pirmi naabot na tipi-pista na Hulyo. Kun maimod mo an bali’og ko sadto, mahadok ka. An sanga-sanga sadto, lukban na pambihira an pagkahingpit. An lastiko nan san anit, pinili pa sin mayad sa sayo na tindahan do’on sa Central. Kaya ngani hanggan ada niyan, wara pa makadaog san kadaghan san nabiktima ko na paklang.
________________________
Retrato ni AB Mina. Salamat po.

Advertisements

7 thoughts on “Salbatana !

  1. saday-saday man an retrato di’ masyado masabutan na salbatana ngay-an an gapot san bata. mayad kunta kun an insasalbatana an udo san karabaw sa but-nga san tinampo.

    Like

  2. Salamat san komentaryo mo, Buskay. An saday na retrato, tinuyo ta basi madali maimod (download) san iba pa na magbibisita. Kun piharan mo sin mayad, madali man ‘gud mareparo an dulaw na lastiko. Du’upon mo pa, maiimod mo an buyungaw na inhihimunta sa kudal na sim.

    Like

  3. Mayad man ta naisipan niyo maghimo sin website for Buluseño. Dianisun! Basi pa mapreserve an kultura nan gawi gawi san mga taga-Bulusan. Imantenir permi an lengguahe na mao ini an naghahatag san kolor sini na “pilsitan”. Hala, maski Ilocano ako sadto, niyan, sugad san mas makusog na an guyod san Bulusan sa ako. Buot ko man na maadalan nan makapagrikurida san literatura san mga Bikolano partikular san mga taga-Bulusan.

    Hala! Magpirilsitan na kita.

    Like

  4. Uy bhongt, aw mayad ka pa daw kay maski diri original na taga Bulusan diritsuhon ka mag bulusanon. An iba man daw na bulusanon pag-unistar sa iba na lugar sin awat-awat diri na nakasurumaton sin diritso na bulusanon. May halo na na ‘dida’ o ‘digdi’ kun unistar sa Sorsogon. Nagiging islang na an ‘mao ini’ nagiging ‘amo ina’. Marasa pa daw ha kay nadidilot san sadiri na lengguahe.

    Mamurut ngon-a kita sin mga nikit kay baga binagyo na naman didto. Nabasa mo an bayabay? baratuhon baga kuno niyan an lagting?

    Like

  5. Si’apo ta yo’n na iba, kun nalasaw pagkatiblangi. Manta, pagkasaluksuki, an tag’ok so’n ‘adaw!’ di’ man ‘ouch!’.

    Like

  6. palagatik! kumusta k n.. mapista n nmn baga sa ato masiramon n nmn an tayuba na tuda pakatapos san fiesta dun.daanison baga an harandaan didto kun fiesta sugad man hamok sin wara sin katapusan an mga putahe na inhahanda sugad baga sin adobo hak sa asin nan suka, suman na may karabasa an mapasuon na sukolate paghinigop mo di mo maaraman an hihnimoon mo kay kun mapasuon ngay-an hanggan sa tutunlan nangalayo mapakaluha ka kun nadalsuan. hehehee badi sinako-sako na nmn an mga kulanting … cge regards happy fiesta na lang sa ato intero na mga bulusanon

    Like

  7. aw kami sadto an surungka dako na uroyag sa balay mi. kondi kay may listo man mag daya …mahod sinusukbit an buskay sa kalingkingan gud dere makaagi sa buho na tigbak! pamati ko domdomon ko pa an pag rumpas soon na sungka.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s